Antonini pecha a tempada

Brillante colofón da Sociedade Filarmónica nunha tempada nada fácil. É de xustiza consignar que a administración dos recursos -máis ben escasos- fíxose cun rigor e un acerto admirables e conseguiuse un notable nivel de calidade nos concertos ofrecidos. Iso non quere dicir que as institucións non deban mostrarse máis xenerosas en subvencionar a unha asociación centenaria que honra á cidade onde ten a súa sede e á comunidade autónoma onde se inscribe. Non podemos perder a alta calidade media da programación que caracterizou as últimas tempadas. Polo que fai ao concerto, debemos lembrar tamén que Il Giardino Armonico realiza unha xira en España que abarca soamente tres lugares: A Coruña, Oviedo e Madrid. Non é a primeira vez que nos visita este espléndido grupo de cámara e o seu director, Antonini, un músico de primerísimo nivel. Ofreceron un concerto signado pola beleza e altura artística do repertorio e a calidade da execución. Destacaron, sobre todo, a Sonata en la menor, de Alessandro Scarlatti, para frauta, dous violíns e baixo continuo, que puxo fin á primeira parte e provocou unha acesa salva de aplausos; e tamén os dous grandes concertos de Vivaldi, intitulados A notte (RV 104) e Il gardellino (RV 90). Antonini puxo en valor toda a fermosura do primeiro coa frauta, e realizou co frautín de maneira maxistral as ornamentacións do segundo, que imitan o canto do ave que dá nome á preciosa partitura: o jilguero. O público manifestou un enorme entusiasmo tras a audición deste notable concerto vivaldiano que pechou o acto musical.